قلبي في هذه القلوب التي تندثر وتسقط من كسرة الآلام

بحبــــك أوي ووحشتني


ده أغلى إنسان عندي ربنا يرحمه يارب ويدخل فسيح جناته


وحشتني أوي أوي أوي يا عمو :(:(:(


ياريت كل انسان يزور مدونتي يقرأ له الفاتحة

ربنا يرحمه يارب هو وكل موتى المسلمين

آمين يارب العالمين


My Uncle >>> Love U

My Uncle >>> Love U

Friday, September 19, 2008

ثـــــــــــاني تـــــــــــاج

السلام عليكم ورحمة الله وبركاته

بسم الله الرحمن الرحيم


ثــــــــــاني تـــــــــــــاج
اسيكم جميعا طبعا موضوع التاجات ده أنا كنت متعودة أقرأه زي ما سبق ووضحت في التاج الأول لي بس بقيت مستقصدة بقى هههههههه لأن علاء صاحب مدونة عجبي قام بتدبيسي في تاج ثاني وللأسف في كمان تاج ثالث لسه هجاوب عليه بس كل ما يكون عندي وقت بقى وربنا يهون بيه موش بحب يكون عندي تراكم هوم وورك المهم أنا هعمل التاج الثاني أخيرا وربنا معايا هردهالك يا علاء وأقتلك في كذا واحد بس أفوقلك ماثي ماثي هههههههههه


بسم الله أبدأ:-


السؤال الأول:-

_______


بدأتي تدوين من إمتي؟ ودخلتي العالم ده إزاي ؟


بدأت تدوين من عام 2007 تحديدا شهر أكتوبر بس موش فاكرة بصراحه إمتى التاريخ بالظبط --- ودخلت عالم المدونات عن طريق ظروف صعبة مريت بيها لما كان والدي تعبان وكنا مضطرين نسافر فترة نقاهة كان في دكتور لازم يتابعه و شخص يقيس له الضغط وهكذا وكان الشخص اللي بيقيس له الضغط واسمه محمد أحيانا بيكلمني و يناقشني ولقيته بيقولي عن المدونات وإن عنده مدونة وإداني عنوانها وكده وكان مفروض لما أرجع إن شاء الله من السفر أعمل مدونة مشتركة بيني وبينه نكتب فيها بنظام ما وبأسلوب محدد كنا حددناه سوا المهم أنا كنت أسمع عن عالم البلوجز كتير بس موش جربته ولا دخلته إطلاقا لحد ماهو عرفني فكرت وعملت مدونة كتبت فيها أربع موضوعات كنت سبق وكتبتهم في الكشكول بتاعي ولقيت فيها زوار وهكذا وطبعا موش ألميت بكل حاجه في المدونة فغصب عني عملت حاجه خليتها ضاعت خالث إهيء إهيء .. بس الحمد لله عملت واحده تانيه وساعدني فيها شخص صديق وأخ محترم جدا وعلمني فيها اللي كنت بقع فيه وموش أعرفه وموش بخل عليا بصراحه وهو صاصا صاحب مدونة حكايات زمان

وبرده بتعلم فيها كل اللي كان بيقولهولي ووقعت برده إلى أن وصلت للمدونة دي ونقلت فيها كل موضوعاتي وطبقت أخيرا اللي اتعلمته وبقيت بحب المدونات جدا وأعمل سيرش دايما عشان ألاقي مدونة موضوعاتها أنسجم معاها وأحسها أوي وفي كتير بيعجبوني ده بالظبط اللي حصل من وقت ما عرفت يعني إيه مدونات .


السؤال الثاني:-

ـــــــــــــــــــــــــ


إيه كان انطباعك من البداية ؟


بالنسبة لي أي شيء جديد عمري ما دخلته ولا أعرف عنه حاجه بيفكرني بأول يوم ليا في الروضة مبسوطة وخايفة عايزة أعرف وأتعلم لكن خايفة من العالم الجديد اللي داخلاه جوايا قلق وفضول للمعرفة حابة أعرف فيه كل حاجة حابة أتكلم فيه حابة يكون دي دنيا أنا برسمها وأصممها بحط فيها صوتي وإحساسي حتى لو موش مسموع أو مرئي كنت حابة اللي أحسه او نفسي أقوله أو تاعبني يخرج بره الكشكول بتاعي و تتوسع دايرة دنيتي شوية حبيته أوي حسيته لذيذ وخفيف في تعامله موش مرهق حسيت وأنا بدخل المدونة إني معايا مفتاح صوت قلبي وعقلي وإنهم دايما معايا وبكلمهم بيحسوا وبيشوفوا اللي حواليا وفجأة ينقلوه نيابة عن لساني من غير صوت بس بإحساسهم و تفاعلهم باللي شوفته حبيت العالم ده جدا .


السؤال الثالث:-

ــــــــــــــــــــــــــ


مين أكتر واحد بتهتم بتعليقه على بوستك الجديد ؟


صدقني موش كنت اعرف التعليقات أنا كنت أسمع كلمة تعليق في المنتديات اللي بدخلها وبشارك فيها وأقول رأيي وأسمع رأي غيري كنت حاسه إن مدونتي دي دنيتي عالمي الخاص اللي بقول فيه كل حاجه مفرحاني ومزعلاني وعمري ما كنت بتوقع رد أي حد عليها أو إن حد يقدر يوصلها إلا لو اديته عنوانها بنفسي عارفه إن كان سهل الوصول من جوجل كسيرش لكن صدقني كنت بحسها دنيتي لوحدي وصوتي فيها غير مسموع احساسي غير محسوس غير من قلبي وعقلي وبس بقوله بيهم وبيردوا هما عليا فيه وكأني بكتب البوست كسؤال وإجابة بنفس الوقت ولما بلاقي كومنت على أي بوست ليا كنت بفرح موش إن لمدونتي زوار لاء بالعكس كان إحساسي بيتولد إني موش مجنونة غن في صوت في دنيتي دي إن في حد سامعني وحاسس بيا و بقيت بقرأ الردود بصوت أصحابها وأحس بيهم بيكلموني حتى ولو بيواسوني كنت بكون مبسوطة إن حد سامعني وممكن يكون حاسس بيا أوي بقيت بهتم بكل ردودهم أصبر نفسي بيها وأتعلم أكتر منها .


السؤال الرابع :-

_______


إيه أهم حاجه اتعلمتيها من عالم التدوين ؟


أكتر حاجه اتعلمتها واتبسطت بيها كتير إن في أصوات غيري بتتكلم شبهي ومختلفة عني إن في صوت في الدنيا بيقول لاء ده غلط ده صح إن في رأي حر بدون قيود إن في تبادل معرفة ونصح حميمي بين الناس موش تكبر وغرور وإنت إزاي تكلمني كده وإلزم حدودك

اتعلمت إني أقول مهما أقول هلاقي حد يحس بيا ويسمعني ولو صوت واحد اتعلمت إني أنسى همومي بمجرد ما عيوني تدمع وانا بقرأ بوست لغيري حسيت بيه ببقى عايزة أروح لحد عنده أعمله أي حاجه عشان يكون فرحان وموش زعلان ومهموم وإني حزني مهما كان كبير بيتحول لما أشوف غيري تعبان في مدونته وموش عارفه أعمله إيه بنسى نفسي وأفتكر إن في شخص حزين ومهموم إني في حد عنده ظرف طارق والله اعلم بيه يـــأه اتعلمت كتير بجد وحسيت بيهم كتير كنت بفرح لفرحة اللي بيحب جديد أو خاطب أو اتجوز وأبكي على حال المجروح أو التعبان وأقول ياريتني كنت أقدر أعمله حاجه أو كنت أعرفه مباشرة يمكن يكون ربنا جاعلنى سبب له لتخفيف همه اتعلمت إني أٌبل النصيحه وأحسها بجد وإني أنصح غيري باللي يمليه عليا ضميري اتعلمت إن الدنيا فعلا لسه فيها خير ولو بسيط بس ما زال موجود ناس طيبين وبيحسوا بيا وممكن يكونوا مصدقيني وممكن يكونوا حاسين بيا اتعلمت إن في أصوات حرة كتير بترفض الظلم والإنكسار وبتقول رأيها بدون خوف ,,

صدقني يا علاء لو عديت اللي اتعلمته صعب أحصره وصعب أنقل إحساسه لأنه عالم بجد شاف ضحكتي ودموعي مع بعض دون انفصال .


السؤال الخامس:-

ـــــــــــــــــــــــــــ


إيه أكتر حاجة كرهتيها ؟


كرهت السلبية اللي شوفتها في بعض الردود والموضوعات في مدونات كرهت الإنحطاط الأخلاقي والديني اللي لاقيته في بعض المدونات كرهت الأذى اللي بيجي من بعض مدونات ردت على مدونتي وإما أذوني بكلمات قذرة ومواقع قذرة أو فيروسات يبعتوها ويقولوا إنه حاجه كويسة كرهت الشر اللي في بعض البشر اللي في عالم المدونات ده اللي كرهته لحد دلوقت بث ههههه الله أعلم هشوف إيه تاني من البشر .


السؤال السادس:-

ـــــــــــــــــــــــــــ


حاسة إن التدوين له تأثير ؟


ماهو موش شرط التدوين المهم محتوى التدوين المصداقية والعقلانية اللي فيه ده بالنسبة لتأثير المدونات الاخرى عليا لكن عموما بما فيهم مدونتي فده بصراحه ريحني كتير خلاني أحس نوعا ما بوجود الخير في الدنيا خلاني أصدق إن في ناس فعلا بتخاف ربنا وإن فيهم اللي موش بيخاف يقول رأيه أثر فيا بجد عالم المدونات واتعلمت منه كتير وشفت ناس كتير مهمومة وناس فرحانه وناس ذوي خبرة بجد اتعلمت منه كتييييير


أهدي التاج لمين يا ميرو لمين :-


1- أحمد صاحب مدونة لاست فرعون


2- مصطفى صاحب مدونة حكايات زمان


3- شباب أونلاين

Monday, September 15, 2008

أول تــــــــــــــــــاج

السلام عليكم ورحمة الله وبركاته

بسم الله الرحمن الرحيم


مرحلة التاج

كتير شوفتها في بعض المدونات اللي بدخلها وكنت بستمتع بيها أوي لأنها بتخليني أقرأ البشر أكثر وأتعرف عليهم من خلال حديثهم عن نفسهم كنت بخاف يجيلي تاج موش لأني موش عايزة حد يعرفني لأ لأني تعبت أقول مين مريم وهما مصدقين مريم ولا لاء اللي جوه النت وداخل مدونتها وبترد في عالم المدونات والمنتديات هي هي اللي بره النت ولا دي واحده بترسم شخصية غير شخصيتها موش عارفه حد هيفهم احساسي اللي حساه ولا لاء اللي معاشرني في الحقيقة بيأكدوا إني بالفعل شخصية واحده موش إزدواجية واللي عارفيني نت كتير بيظلموني احترت بجد ومع ذلك هجاوب على ال 3 تاجات الموجهين ليا وربنا يعلم إن مريم فيهم نفسها مريم اللي بره الشاشة دي


أول تاج موجه من مدونة دخلتها صاحبتها لذيذة أوي قرأت فيها شوية وانقطعت وبلغتني إن يوجد لي تاج عندها وكان في أغسطس وبعتزرلها للتأخير غصب عني بجد موش كنت عارفه أتكلم وأحكي عن حالي للأسباب التي وضحتها بالأعلى


هذا التاج موجه من fire bird طائر النار


والآن سأجيب على أول تاج :-

ـــــــــــــــــــــــــــــــــــــــــــــــــــــ


1- أذكر 5 أحلام على الأقل تخص ماضيك وتحلم فيها بتغيير أشياء ماذا ستعدل وماذا ستترك ؟


أ- الحلم الأول :-

ـــــــــــــــــــــــــــــ

كان نفسي يبقى لي أخت شقيقة أحكيلها وتحكيلي أترمي في حضنها وقت ما الدنيا تيجي عليا أزورها وهي متجوزه في بيتها ألعب مع ولادها أسمع منهم كلمة خالتو الأم الثانية ليهم لكن ربنا موش أراد يبقى لي أخوات بنات وفضلت وحيدة أهلي بنت واحده


ب- الحلم الثاني:-

ـــــــــــــــــــــــــــ


حلمت يكون لي أخ أكبر مني يبقى سند ليا في الدنيا حما من الأيام وغدرها صاحب أحكيله وقت ما أقع في أزمة أب تاني ليا حنان جارف يحسسني إني بنته موش أخته وبس يبقى ليا كل حاجه وأبق له كل حاجه أخرج معاه الناس تحسدنا على بعض تحتار ده أخوها ولا جوزها ولا صديق ولا إيه بالظبط من قوة علاقتنا اللي بتربطنا ببعض كان نفسي ولكن ليس كل ما يتمناه المرء يدركه ربنا يباركلي في محمد أخويا هو أصغر مني وحاولت يكون معايا زي ما بتمنى موش عرفت


ج- الحلم الثالث:-

ـــــــــــــــــــــــــــــــ


حلمت أعيش في عيلة يكون كلها حب في حب إخلاص وفاء ناس تحس ببعضها بجد تقدر كلمة الترابط الأسري الإتحاد وقت الأزمات الكلمة الواحده من غير ما تتقال بالأمر لكن بالحب كله يقولها مع بعض في صوت واحد الجيب الواحد محدش يقول دي بنت اخويا لكن يقول بنت اخويا هي بنتي بنت أختي هي بنتي ولاد العم هما أخوات موش ولاد عم وبس الحب للحب خارج المصلحة العيلة يعني اللمة الضحكة الكلام والسؤال عن حال بعض موش كلام عن سيرة الناس ونقد الغير وإحنا فينا عيوب حلمت وفي أحلامي بس برسم ده وإلا لو ضاع حتى حلمي موش هعرف أعيش في الدنيا دي.


د- الحلم الرابع:-

ـــــــــــــــــــــــــــــ


حلمت أدرس كل حاجه بحبها وعايزة أعرف فيها وأنمي معلوماتي ولو بقدر بسيط بس أعرف وأفهم واللي أعرفه أفيد بيه غيري وياسلام لو غيري ده موش قادر يتعلم أبدأ معاه أنا وأساعده موش عارفه أوصفلك إزاي بس بالظبط إحساسي كأني عايزة أقعد في بيئة الغير قادرين على كل حاجه وأحاول أساعدهم على أد ما أقدر أسمعهم أحاول أوصل صوتهم أحل مشاكلهم وبرده ده حلم والناس بتفتكرني مجنونه أو مثالية زيادة عن اللزوم أو بلعب دور ملاك باتقان يــــــاه على اللي بسمعه .


هـ - الحلم الخامس:-

ـــــــــــــــــــــــــ


حلمت أعرف الناس مين هي مريم بل موش حلم ده تمني تعبت كتير في الحلم ده قبل ما أنام بدعي ربنا الناس تحبني وتعرفني عشان حاسين إن هي دي مريم شخصيتها دي الحقيقية بكون حزينة أوي لما ألاقي حد يقولي إنتي ساذجة دي موش طيبة أو إن طبعك كده وهو موش يعرفني بقعد أقول كتير طيب عاشروني الأول حاولوا تعرفوني عن قرب وأكيد موش ملاك وراضيه أبني معاكم أهدم الغلط اللي فيا و أصلحه وأبقى للأفضل بس موش يتهموني من غير ما يعرفوني فشلت أخلي الناس تفهم مريم عن قرب كله يشوفها من بعيد بنظرة قريبة من وجهة نظرهم بينت كل حاجه


2- أذكر 5 أحلام على الأقل تخص مستقبلك ؟


أ- الحلم الأول:-

ـــــــــــــــــــــــــــ


بحلم أحقق رسالتي الأولى اللي قال عليها ربنا وأتقنها وأحققها بنجاح تحت رعاية ربنا إني أكون زوجة صالحة لزوج يكون لي كل حاجه أب وأخ وصديق وأم وأخت وأهل وابن وأكون عنده كل حاجه يحس بيا وأحس بيه من غير ما نحكي و أنجب أطفال 4 توائم يملوا حياتنا وأبني العيلة اللي بحلم بيها وأتمنى تكون زي ما بحلم عيلة شايفة مامتها وباباها كل حاجه ليهم أصدقاء وأهل وأخوات وكل حاجه ليهم وبردوا يحسوا بينا ونحس بيهم من غير كلام .


ب- الحلم الثاني:-

ـــــــــــــــــــــــــــ


بحلم أكون دكتورة بالجامعة وأكمل في مجال يفيد الناس وأشتغل في كادر مهم بالحياة يفيد غيري قبل ما يفيدني المهم إنه يحقق الخير لغيري قبل ما يحققه مني عشان أحس إن ليا فايده في الدنيا و قدرت أسعد غيري وأغير حياته بعد مساعدة ربنا.


ج-الحلم الثالث:-

ـــــــــــــــــــــــــــ


بحلم أعرف في الكمبيوتر من أول مسمار اخترع فيه لآخر حاجه في عالم الكمبيوتر و أعمل مدرسة صغيرة أعلم فيها كل الأطفال الغير قادرين على التعليم أعلمهم فيها كل حاجه في الكمبيوتر و يتعلموا لغة كمان عشان يقدروا يلاقوا شغل زي ما إحنا شايفين الشغل بقى بشروط يعني الناس دي تموت ولا إيه ؟


د- الحلم الرابع:-

ـــــــــــــــــــــــــــ


بحلم أحفظ القرآن كله وأكون من حاملي كتاب الله أتكلم كلام ربنا وبسنة رسولنا الحبيب وأعلم ولادي كده ويكون كلامهم مبني على صحة كلام ربنا وسنة الرسول وبس وموش يعملوا بكلام حد تاني غير كلام ربنا وبس وبكده هيراعوا ربنا في كل حاجه .


هـ - الحلم الخامس:-

ـــــــــــــــــــــــــــــــ


بحلم أكمل أركان إسلامي بالحج بس قبلها أطلع ماما تحج قبل مني ربنا يكتبها لها يارب وتتكتبلي أحج أنا كمان وأعمل حجة كمان لإنسانة حبيتها أوي من كلام انسان عليها وتوفاها الله واعتبرتها زي ماما بالظبط وبتمنى كل حاجه موش عملتها بالدنيا ومسموح لحد يعملها نيابة عنها ربنا يقدرني وأعملها عشانها وبقولها ربنا يرحمك يارب ويغفر لك ويدخلك جناته اللهم آمين يارب العالمين .


3- أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟


هو أنا بحياتي ناس موش كتير وموش قليلين لكن بحبهم أوي بجد وبيخافوا عليا وبيحبوني أوي ومن معاشرتي ليهم ومعاشرتهم ليا عرفوني بجد وربنا يخليهم ليا يارب ويديم الحب بينا بس أكتر اتنين اتمنيت يكونوا في حياتي جواها أوي ويربطني بيهم صلة يمكن حد منهم دخل نوعا ما وبقى قريب ليا ويعرفني كويس هي رشا ونانيس بحس فيهم كتير إنهم عارفيني واتمنيت تكون بحياتي من يوم ما اتولدت وجيت للدنيا وبصراحه اتمنيتهم يكونوا ليا أخواتي من أم واحده وأب واحد والشخص التاني هو حبيبة ودي طفلة بموت فيها جدااااااا اتمنيت أقابلها وتعيش معايا وأعيش معاها وتبقى حياتي بيها مرتبطة بشكل دائم خارج مرحلة التمني بس زي ما قلت موش كل اللي بتمناه بيتحقق حظي كده


4- أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟


كنت بتمنى أعاهد عصر الرسول أو يكون موجود لحد الآن وأتعلم منه كتير حاسة إن في كتير حاجات كانت هتتغير وتبقى أحلى بالدنيا

والشخص التاني موجود وبحس كتير إنه موش معايا و موش موجود بس كل اللي بتمناه إنه يفضل في حياتي للأبد لحد ما أموت ويكون لي منه أطفال في طيبته وخفة دمه وتكون بينا أقوى رابطه في الدنيا تكون قايمة على الحب والحنية والطيبة والمودة والرحمة وياريته يكون فعلا موجود زي ما بتمنى ويكون هو كمان بيتمنى


بهدي التاج لمين ؟؟


ممكن أقول إن التاج ده بتمنى مين يرد عليه :-


ahmed_k صاحب مدونة دردشة عربي


nour el deen صاحب مدونة نور الدين


أحمد صاحب مدونة last_fr3oon


sasa صاحب مدونة حكايات زمان


عايش ولكن صاحب مدونة عجبي


بتمني كل الناس تجاوب على التاج بس يلا نبدأ بدول ويارب موث يكثفوني خالث بقى ويجاوبوا علىا لتاج زي ما أنا جاوبت


ورمضان كريم ليكم جميعا


في رعاية الله

Saturday, September 13, 2008

بدعـــــــــــــي لأبويـــــــــــــا

السلام عليكم ورحمة الله و بركاته
بسم الله الرحمن الرحيم

دي أغنية هاني شاكر ولكن للأسف قصيرة جدا وانا حسيتها كتير وحسيت بكلماتها وآهاته اللي طالعه منه
وحبيت أكملها أنا

الأغنية عبارة عن كوبليه واحد ينتهي عند بالصبر على كل اللي فات ...
بدعــــــــي لأبويـــــا

بدعي لأبويا اللي مات

ولأخواتي البنــــات

ولأم شايلة همهم

بالصبر على كل اللي فات

بدعي وأقول يارب قدرني

و على الأيام قادر تصبرني

هعيش لأمي ولأخواتي
ويارب يا قادر تكرمني

يارب هستعين بيك في خطواتي

وهدعيك أكتر في صلاتي

ما قلت أدعوني أستجب

يارب تحفظلي أمي و أخواتي
حمل كبير وشايله يا ربي

وهتبدأ خلاص مع الدنيا حربي

ومعاك مؤمن بنصرك

وموش خايف الدنيا تغدر بي


Saturday, September 6, 2008

الإنسان بقى رخيص أوي كده يارب العالمين انتفم منهم يارب

السلام عليكم ورحمة الله وبركاته
بسم الله الرحمن الرحيم


هو الإنــــسان بقى رخيص أوي كده


أول مرة أبكي في رمضان وأنا موش بقرأ قرآن طول عمري ببكي خشية للرحمن عند

تلاوتي للقرآن

ولكن الآن وبعد ما سمعته وقرأته لقيت إن فعلا لهم حق يقولوا إن مصر بلد الأمان ...


فين الأمان ده وليه يعملوا في الغلابة كده


وإيه الحكومة في خدمة الشعب واخترناك اخترناك تبقى رئيسنا و تبقى معانا ايديك بايدينا

عينيك راعيانا


الله على الهتافات اللي بسمعها وغصب عن أي حد لازم كله يوافق وإلا كوكب ما وراء

الشمس هيتملي بالبشر ويتحرق


وأهو في الآخر اسمهم بني آدمين أرخص سلعه في العالم


حرام ولا حلال اللي حصل ده في منطقة جبل الدويقة بالقاهرة يرضي مين ياااااه على

البشر


أطفال وشيوخ تموت عادي ستات بنات تحت الأنقاض من الألم تصرخ بدون سكات وبرده

عادي


وكمان لو فكر مواطن أقل من العادي يدخل وينقذ ويمنعوه أهو ده اللي موش نقدر نقول عليه

عادي


جبل يقف عليه مهندس ويستخدم أساليب بدائية للهدم فيه ومعاه عمال وصنايعيه وموش

مهم عندهم أرواح البشرية


ويكسروا ويدمروا وتقع كتل صخرية على بيوت المصراوية ونقول موش مهم المهم

نقضي المهمة ديا


ونخلص شغلنا وطظ في الناس وموش مهم الأرواح ما كده كده ميتين عايشين وموش

عايشين


ياااااااااااااه على دي ناس وفعلا ناس من غير احساس بتنباس تنباس وتمشي بالحراس

وقلوبها حجر صوان


ولسانها شق الثعبان

لما يحصل ده في الشهر الكريم والناس تموت وغيره قاعد في بيته مكتوب على باب بيته

المسئول الفلاني


والحاكم العلاني ونلاقيه قاعد وسط عيلته وبيفطر وناس تحت الحجر وفوقها حجر فوق

حجر سواء من الجبل أو بيوتهم


اللي وقعت بالعجل وموش لاقيه حتى اللي يخرجها يبقى احنا برده في بلد الأمان


وأدي أم سايبة عيالها جوه البيت وخارجه تجيب لهم حاجات البيت لحد ما يأذن الآذان

وتتلم الأطفال على


سفرة واحدة مع أمهم قي قعدة حنان وترجع الأم من بره تلاقي عيالها موش جوه لكن

تحت الحجر يا عالم


ميتين ولا من الألم متوجعين وكمان ياعيني صايمين


حلال ده ولا حرام يا بلد كلها إجرااااام sad.gif


ربي لا أسألك رد القضاء ولكن أسألك اللطف بي


ربنا على القوي بجد حراااااااااااااااااااااام 4.gif 4.gif 4.gif


حسبي ربي ونعم الوكيل sad.gif

Tuesday, September 2, 2008

طفلــــــي الذي أسمعه ولا أراه

السلام عليكم ورحمة الله وبركاته

بسم الله الرحمن الرحيم

طفلي الذي أسمعه ولا أراه




أكتب ويدي تؤلمني من الكتابة ولكن .. الألم لم أشعر به لحاجتي في إخراج شيء ما بداخلي أود قوله ولكن ..حتى القول يجعلني أعجز عن التصريح به , فالبرد يتملك من جسدي ويُصعب من صوتي أن يبوح بما لديه صوتا ولكن .. قلبي لازال فيه نبض وبرغم هزلته إلا أنه بحاجه للحديث معي فعندما استرخيت على سريري وجدت بي أتذكر شيئا لا يخضع للذكرى بل لا زال حاضرا ينبض وأراه بعقلي وقلبي كل يوم , وجدت قلبي يبتسم لاصابتي بأعراض البرد,حيث أنه تذكر تلك الأيام التي سبق وأصيب فيها مع الطفل الذي يسكنه .

حقا أ أنت سعيد يا قلبي لألمي ؟ أم أنك تذكرت تلك الأيام التي كان فيها طفلك بين عينيك تحتضنه وعندما تسمع ألمه يهرول نبضك ياقلبي إليه ويتمنى أن يرحل إليه ليداويه .

فما أجمل طفلي بعيني ! طفل أسمعه ولا أراه , أشعر به مهما كانت المسافات ومهما كان البعد أسمع صوته في أذني كل ليلة .. أتذكر ابتسامته أدعوه ليلعب معي وأستمد منه لحظات مرحه وأقضي فيها بعض دقائق فقط لآخذ اشباعي من سماع ضحكته التي لا أملها و تتردد على آذاني دوما ودوما .....

فهل يصدقونك القول يا قلبي أن تعشق طفل تسمعه ولا تراه أن تصاب بالهزل والإختناق والألم لمجرد أن تعلم أنه مريض أو يصيبه اختناق أو أي ألم , أتشعر به يا قلبي إلى هذا المدى ؟ وكل ذلك بنبضتك التي أصبحت هزيلة وأصابها ما أصاب ولكن تأتي على صوته وكأن الحياة بها متجددة للخير وللحب ولم تعرف معنى الألم وكأن تذكرك صوته هو شفاؤك واستحضارك ضحكته هو دوائك فماذا لو قُدِرَ لك يا قلبي أن ترى طفلك ؟ ماذا سيحدث لك؟

لا أعلم حاولت أن أتخيل ولكن ارتسمت أمامي صور كثيرة فقمت باغماض عيني لمدة دقيقة واحدة والآن حين تثبت عيني على صورة تبقى هذه أمنيتك أيها القلب الوهن الهزيل رحلت الدقيقة في أقل من ثانية فكنت أتمنى أن تطول بعض الوقت ولكن فيها رأيت ما أحلم به فقد ارتسمت أمامي صورة طفلي تتحرك يا إلهي فقد أتى لي بشخصه أغمضت عيني حين رأيته يبتسم لا أصدق ما رأيته أحقا رأيته في هذه الدقيقة أم كان سراب ارتسم خياله يتحرك أمامي فهذا ما تمنيته يا قلبي فحينما أغمضت عيني رأيته وأنا أرتمي بأحضانه أحتضنه بقوة أسند برأسي على كتفيه وأبكي نعم ... أبكي وأقول له أحبك وأذوب في كل مابك , فأنا أحب كل مافيك ويتعلق بك وفجأة انقطعت صورته من أمام عيني وانتهت الدقيقة سريعا ولم أعرف استرجاعها مرة أخرى ووجدتني أسأل قلبي أحقا تحبه تعشق صوته تحب كل مافيه وترضى به مهما فعل بك أحقا تتمنى رؤيته إلى هذا الحد فإن كانت هذه رغبتك ياقلبي وهو يعلم بها فالإحساس يصل مهما كانت المسافات .....

فماذا إذن رغبته واحساسه بعدما عرف أنك تحبه رغم كل شيء وتعشقه وتراه في كل شيء فما شعوره الآن ؟؟؟

Monday, September 1, 2008

حوار مع قلب انسان فيه الإحساس يتكلم ويحكي عما كان

السلام عليكم ورحمة الله وبركاته

بسم الله الرحمن الرحيم

قلب يُطيب ويد تخفف آلام وحضن يضم وعين تصف ما كان


يبدأ اليوم بساعة وساعتي معك أجمل ساعة , فقد أتى عندها عقرب الحياة ليثبت عند الإشارة التي تشير إلى الإحساس و حدث الحوار ولكن قبل الكلام جاء القلب يحمل آلام ويبكي ويصعد بأنينه بركان ليس على حاله بل عن حبه الذي يحمله قرب عام وسيظل طول الزمان , ووقف الحديث ثانية وأتت العين تعشق وترسم بافتنان وتقول سأحكي وأرسم لوحة فنان ولكن سوف تبعد عني الألوان وتعجب الحوار ليجد يد تمتد وتصل للقلب ثم للعين ثم لجبهة هذا الإنسان لتعطي له الأمان وهنا سيبدأ الحوار بسرد كلام ليس أوهام ولكن .. توقف لثانية احترام فقد أتى رمز الحنان وضم القلب بحرقة ولوعة زمان وأخيرا انتهى الوصف ليحكي ما حدث وما كان ولو طال الحوار لتمنى أن يأتي بزمن ما كان وما يتمنى أن يصير بالأكوان مع هذان الحبيبان بل ليس في الحب اسمهما ولكن تابعني أيها الإنسان فدموعي تسري بسرعان:

يحكي في قديم الزمان من يوم فشهر فتقارب سنة على الدوام , اقترب من لغة الحوار أربع معاني تجمعهم لغة واحدة بل كلمة موجهة لإنسان , بدأها القلب على غير حسبان ودنى من قلبه دون سابق إنذار وعلى فيه نبضه واقترب لمرحلة التصريح والإعلان .. وعندما علم بطل قصة هذا الزمان علم ما خفي مني وما بان ولكني لم أندم على معرفته طول الزمان وانقطع حديث القلب فجأة لثوان لتخرج يد ممدودة تكتب اسمه عبر ريشة خارجها الألوان وتعلو بها جملة سأطيب ألمك يا حب الزمان ومسحت اليد على جبهته باسم الرحمن أرقيك وأدعوه يحميك ومن شر الناس يقيك يا أعز خلق الله عندي و من يسكن قلبي على الدوام وانقطع الحديث لليد و انهمرت دمعة حب وألم ذهبت دمعة الحب لقلبه لترسم لديه دفء لعالمه وذهبت لدى قلبي دمعة الألم وحدثتها لما تصابي بالألم فقالت فقلبك شعر أن من تحبيه حزين في دنيا توهان وعقله يجن حيرة لبشر ذلك الزمان فلما يحدث ما يحدث ؟ ولما يظل وحيدا طوال الزمان !!! وانقطع الحديث طيلة الساعات ليعلن عن قدوم بئر الحنان الذي سيروي ظمأ أي انسان ولكنه اختار من البشر ذلك الحبيب الحيران وأعلن استقراره عند حبيبك يا من تكتبين باحساسك أحزان وقال أنه سيضمه ضمة الأهل والخلان وسيطيب ألمه بحضن أم الحنان فيراه دوما في حضنه طفل أجمل مما يتصور , وستكون له ضمة أخت تعطي لحياته معنى وعنوان عن الطيبة والاستكنان , وتأتي ضمة قلبك تحتضنه ضمة تجمع جميع عواطفك وتستقر لديه دون أن تقول له سلام


والآن وقبل الختام فهل ستظل ياقلبي تحمل لديك الأحزان ويظنها من تحبه تمثيل وهذيان وطيبة ساذجة في براعة أداء الفنان فإن كان ذلك قراره , فهناك بدنيا السموات والأرض إله اسمه الرحمن سيرحمك مما أنت فيه ويحكي له ما خفي عنه وما بان وسوف يثبت لك عبر الأيام إنك دوما أغلى من عيني و بقلبي أحب إنسان .
ولك تهنئتي قبل أي انسان كل عام وانت بخير وأمان وصلاح وأفراح دون ذل أو هوان ونجاح وتوفيق بيد القدوس الرحمن