زي النهاردة أنا حــــــــــــبيت

السلام عليكم و رحمة الله و بركاته

بسم الله الرحمن الرحيم


زي النهاردة أنا حـــــــبيت



زي النهارده ابتدينا و ابتدى الحب معانا

وعشنا ليالي في هوانا

فرحانين زعلانين لكن عمر لحظة فراقنا ما عليا تهون

كنت أدور عليك وأسأل كل بشر الكون

يمكن شافوك بعيوني يطمنوني

ويمكن شافوا قلبي في ليلة ما حبك ونادوني

وقالوا معاه لقيتي اسمك في الهوى

وعشتي في قلبه لحد شوقك ما ارتوى

فكرت بقلبي كتير عشانك واتمنيتك تكون ليا وأكون مكانك

وقت جرحك وقت حزنك أشيل عنك هموم

وأكون جنبك وقت فرحك يوم ما تضحك ضحكتك تمحي الغيوم

حاولت أكون معاك بكل حاجه وكنت كتير في ليالي ليك محتاجة

ساعات بتسمع ندايا وتجيني ترد عني أي خنقة في حياتي لو موش معايا تتبدل في ثواني

و أحس بنبضك في قلبي يصرخ ويقول ده معاه دوايا

حتى في يومنا النهاردة

جيت وقلت لك كل عام وانت معايا

عايش في دنيتي و جوايا

غمضت عيني وقلت وقتها يا قلبي روحله وقوله بكل دقه فيك حسها

خليه يعرف أد إيه بتحس بيه أد إيه الحياة تبتدي ما بين إيديه

بتكون سعيد وتبتدي في حياتك معاه يوم جديد كله حب وشوق ولهفه

كله حنان أمان وفي حضنه مبقيتش خايفه

ما أنا لقيت معاه اللي بتمناه

و عايشة بِنَفَسُه في الدنيا وبستناه

يكتبه ليا ربي نصيبي وأعيش بنور عيني وحياتي وأفديه بروحي

و أقول يارب يحفظه ويباركلي فيه و يخليه بس فاضل كلمة واحده ....

هتكمل في يومنا النهارده عشان تتكتب في السما دعوة وملايكة ربنا سامعه

بحبك في كل يوم وأي يوم ولو عدى يوم من غير ما أشوفك أو أسمعك تعمى عيوني و تموت في السما نجوم

و وقت ما أسمعك و أشوفك أصرخ بقلبي و أجيلك

و أقول لكل الدنيا وعينيك بموت فيك و أحب فيك كل مافيك ولو اللي فيك موش عاجب حد

كفاية عاجبني وبعمل اللي يرضيك

معـــــــاك و بتبص حواليك

السلام عليكم و رحمة الله و بركاته

بسم الله الرحمن الرحيم

معـــــــــاك و بتبص حواليك

الإنتظار في سكات ألمي زاد و حيرني

ساعات أشوفك و أقول خلاص اتغير و قدرني

يفوت يوم و التاني و ألاقيك زي ما إنت دايما تزعلني

وتزيد في جرحي وعذابي وأدعي ربــــي يصبرني

الغريب إني عمري ما جرحتك و إنت على طول تجرحني

عايشة عشان أرضي ربي و أرضيك و إنت ولا في فايده فيك

تعبتني معاك أوي كل ده عشان قلت بتمنى أعيش ليك

تفتكر دي غلطة مني إني أقول بحبك وباقية عليك

و لو كانت دي غلطتي يبقى العيب فيا ولا فيك

إديتك كل حاجة و إنت دايما تبص حواليك

ونفسك تجمع كتير منا و تشوف في عنيهم نظرة هنموت عليك

لكن صدقني في النهاية هتخسر و هتقول كفاية أنا ظلمت حد بجد

وفعلا كانت بتحبني وضيعتها من ايديا وياريتها فضلت معايا

و وقتها موش هعرف أحس بيك لأنك هتكون زي ما شفت حبي

هتشوف مني كرهي ليك و زعل على كل دمعة نزلت في ألمها عليك

دمـــــــي يُحدث قلبي

السلام عليكم و رحمة الله و بركاته

بسم الله الرحمن الرحيم

دمي يُحدث قلبك

حينما كنت أجلس بالأمس حدثت لي أشياء كثيره جعلت داخلي بركانا من الأسى والحزن

و برغم ما كنت أنا فيه إلا أنني وجدت بي أتذكر وأدنو من تلك الصورة

ولا أعلم لماذا حينما أراها يحدث لي ما يحدث حتى وإن لم تكن بجواري فكل غمضة عين يسكن بها الرمش عن العالم

ليريح نفسه لثانية ترتسم ملامح هذه الصورة و كل غمضة يسقط فيها رمش عليها

و كنت اخاف حينما يسقط أن يعبر على تلك الصورة في سقطة ألم وكنت أتعجب لما كل مرة يسقط في كل غمضة رمش

بعيني

وعلمت السبب و ياليتني أكون رمشا دوما .. حيث كنت أرقبه من بعيد و أراه يدخل عبر جسده مخترقا قلب هذه الصورة

في سكون دون أن يشعر وإذ به بقدرة عجيبة مألوفة من حجمه الصغير يتحول ليد حنونة تمحو آثار آلامه

وتزيل من قلبه جميع أحزان هذه الصورة و هنا فتحت عيني لأرى هل كنت أحلم أم إنها حقيقة ولكن حدث ما لم أتخيله

فقد توقف الرمش عما كنت أراه من ثواني يفعله وظننته حلما وياليته يتكرر وسقطت من عيني دمعة خوف ويأس

فقد تمنيت أن أكون له رمشا أمحي ما يكون به من ألم و حزن ولم يسع قلبي أن يرى لهيب دمعتي حتى ارتجف

رجفة قوية جعلتني أنتفض و كأن عرش سماء القلب يحدث له رعد ليعلن عن غضبه من شيء ما .. و هنا أيقنت عيني

أن ما شاهدته ليس حلما بل حقيقة وانشق جسدي وانثقب قلبي ونزف بشدة وأصبح الدم يثور و يثور

ويمتد في طريقه حتى ذهب إليه .. نعم ذهب إلى تلك الصورة و ثار ثورة قوية بصوت ارتجف لها جسدي والغريب أن قلبي كان

سعيدا للغاية لما يفعله ولأنني كنت لا أعرف ماذا يريد وبما يفكر رمقته بعيني فقط خائفة أن تصيب الدماء صورته أو أن تؤذيه

بشيء وتوقفت الثورة معلنة بالحديث ولكن كان على شكل إبهامي لم أستطع فك طلاسمه بعيني فقط ولكن قلبي كان يعي

كل شيء وسارت دماء قلبي في بطء حتى سكنت على قلبه و أعلنت انشقاقها نصفين متجمعة من وسط قلبه حتى نهايته

ووجدتها تأخذ بقلبه شكله ومكانه وتسكن وتعلن اطمئنانها ومن هنا صرخ قلبي .. صرخ بقوة و تكلم وامتلأ صوته عنان السماء

وقال أتريدين دمائي تسكن قلبك فكيف وأنا قلب بكٍ ولكن مع من تحبين وكيف لي أعيش داخلك وانتي بأنفاسك تتفوهين

باسمه وبكل نفس منه أنبض فيكي فكيف لي أرى هذا من بعيد فدعيني أسكن إليه فكما بعينيك تسكن صورته

فبدمائي سأرويه وأعيش داخله حتى تنفذ آخر قطرة بي

وصمت بعدها القلب ووجدتني بشفاهي ألفظ آخر آهاتي

باسمك يا من أحييتنا وخلقتنا بقلب نحبك ونحب كل من أحبك

اجعل من قلبي سكنا له وشفاءا له وفداءا له

وإن كان القدر يخفي له مكروها فأعطني إياه ولتكن إصابتي بدلا منه

وإن أصبتني بسقما فسأحمدك دوما عليه لأن جانب سقمي حبا يعيش قلبي عليه

فلتعطيه الحياة والهناء وتجعل منه انسانا قائم لك دوما على الثناء

وأنت وحدك ربي من تعطيني ما أريده وأصلي دوما من أجلك لأحمدك عليه

يــــــــــارب هــــــون عليه

السلام عليكم و رحمة الله و بركاته

بسم الله الرحمن الرحيم

يـــــــارب هـون عليه

ببكي و بكايا يزيد على حال داخل حالي

ودمع عيني يفيض ولا أعرف أقول أنا مالي

و زاد لي جرح جديد على قلبي جرح غالي

حزني في قلبي عليه يتجرح وأتمنى أداويه

خايفة وروحي فيه لكنه رافض حبي ليه

وبرده هفضل أحبه ماهو عارف إني بموت فيه

يارب يا قادر ولا غيرك قادر هون دايما عليه

وخليك دايما جمبه هنيه واهديه

وخليه دايما مرتاح

واجعل حياته أفراح

وابعد عنه الجراح

آمين يارب العالمين

ثـــــــــــاني تـــــــــــاج

السلام عليكم ورحمة الله وبركاته

بسم الله الرحمن الرحيم

ثــــــــــاني تـــــــــــــاج

اسيكم جميعا طبعا موضوع التاجات ده أنا كنت متعودة أقرأه زي ما سبق ووضحت في التاج الأول لي بس بقيت مستقصدة بقى هههههههه لأن علاء صاحب مدونة عجبي قام بتدبيسي في تاج ثاني وللأسف في كمان تاج ثالث لسه هجاوب عليه بس كل ما يكون عندي وقت بقى وربنا يهون بيه موش بحب يكون عندي تراكم هوم وورك المهم أنا هعمل التاج الثاني أخيرا وربنا معايا هردهالك يا علاء وأقتلك في كذا واحد بس أفوقلك ماثي ماثي هههههههههه

بسم الله أبدأ:-

السؤال الأول:-

_______

بدأتي تدوين من إمتي؟ ودخلتي العالم ده إزاي ؟

بدأت تدوين من عام 2007 تحديدا شهر أكتوبر بس موش فاكرة بصراحه إمتى التاريخ بالظبط --- ودخلت عالم المدونات عن طريق ظروف صعبة مريت بيها لما كان والدي تعبان وكنا مضطرين نسافر فترة نقاهة كان في دكتور لازم يتابعه و شخص يقيس له الضغط وهكذا وكان الشخص اللي بيقيس له الضغط واسمه محمد أحيانا بيكلمني و يناقشني ولقيته بيقولي عن المدونات وإن عنده مدونة وإداني عنوانها وكده وكان مفروض لما أرجع إن شاء الله من السفر أعمل مدونة مشتركة بيني وبينه نكتب فيها بنظام ما وبأسلوب محدد كنا حددناه سوا المهم أنا كنت أسمع عن عالم البلوجز كتير بس موش جربته ولا دخلته إطلاقا لحد ماهو عرفني فكرت وعملت مدونة كتبت فيها أربع موضوعات كنت سبق وكتبتهم في الكشكول بتاعي ولقيت فيها زوار وهكذا وطبعا موش ألميت بكل حاجه في المدونة فغصب عني عملت حاجه خليتها ضاعت خالث إهيء إهيء .. بس الحمد لله عملت واحده تانيه وساعدني فيها شخص صديق وأخ محترم جدا وعلمني فيها اللي كنت بقع فيه وموش أعرفه وموش بخل عليا بصراحه وهو صاصا صاحب مدونة حكايات زمان

وبرده بتعلم فيها كل اللي كان بيقولهولي ووقعت برده إلى أن وصلت للمدونة دي ونقلت فيها كل موضوعاتي وطبقت أخيرا اللي اتعلمته وبقيت بحب المدونات جدا وأعمل سيرش دايما عشان ألاقي مدونة موضوعاتها أنسجم معاها وأحسها أوي وفي كتير بيعجبوني ده بالظبط اللي حصل من وقت ما عرفت يعني إيه مدونات .

السؤال الثاني:-

ـــــــــــــــــــــــــ

إيه كان انطباعك من البداية ؟

بالنسبة لي أي شيء جديد عمري ما دخلته ولا أعرف عنه حاجه بيفكرني بأول يوم ليا في الروضة مبسوطة وخايفة عايزة أعرف وأتعلم لكن خايفة من العالم الجديد اللي داخلاه جوايا قلق وفضول للمعرفة حابة أعرف فيه كل حاجة حابة أتكلم فيه حابة يكون دي دنيا أنا برسمها وأصممها بحط فيها صوتي وإحساسي حتى لو موش مسموع أو مرئي كنت حابة اللي أحسه او نفسي أقوله أو تاعبني يخرج بره الكشكول بتاعي و تتوسع دايرة دنيتي شوية حبيته أوي حسيته لذيذ وخفيف في تعامله موش مرهق حسيت وأنا بدخل المدونة إني معايا مفتاح صوت قلبي وعقلي وإنهم دايما معايا وبكلمهم بيحسوا وبيشوفوا اللي حواليا وفجأة ينقلوه نيابة عن لساني من غير صوت بس بإحساسهم و تفاعلهم باللي شوفته حبيت العالم ده جدا .

السؤال الثالث:-

ــــــــــــــــــــــــــ

مين أكتر واحد بتهتم بتعليقه على بوستك الجديد ؟

صدقني موش كنت اعرف التعليقات أنا كنت أسمع كلمة تعليق في المنتديات اللي بدخلها وبشارك فيها وأقول رأيي وأسمع رأي غيري كنت حاسه إن مدونتي دي دنيتي عالمي الخاص اللي بقول فيه كل حاجه مفرحاني ومزعلاني وعمري ما كنت بتوقع رد أي حد عليها أو إن حد يقدر يوصلها إلا لو اديته عنوانها بنفسي عارفه إن كان سهل الوصول من جوجل كسيرش لكن صدقني كنت بحسها دنيتي لوحدي وصوتي فيها غير مسموع احساسي غير محسوس غير من قلبي وعقلي وبس بقوله بيهم وبيردوا هما عليا فيه وكأني بكتب البوست كسؤال وإجابة بنفس الوقت ولما بلاقي كومنت على أي بوست ليا كنت بفرح موش إن لمدونتي زوار لاء بالعكس كان إحساسي بيتولد إني موش مجنونة غن في صوت في دنيتي دي إن في حد سامعني وحاسس بيا و بقيت بقرأ الردود بصوت أصحابها وأحس بيهم بيكلموني حتى ولو بيواسوني كنت بكون مبسوطة إن حد سامعني وممكن يكون حاسس بيا أوي بقيت بهتم بكل ردودهم أصبر نفسي بيها وأتعلم أكتر منها .

السؤال الرابع :-

_______

إيه أهم حاجه اتعلمتيها من عالم التدوين ؟

أكتر حاجه اتعلمتها واتبسطت بيها كتير إن في أصوات غيري بتتكلم شبهي ومختلفة عني إن في صوت في الدنيا بيقول لاء ده غلط ده صح إن في رأي حر بدون قيود إن في تبادل معرفة ونصح حميمي بين الناس موش تكبر وغرور وإنت إزاي تكلمني كده وإلزم حدودك

اتعلمت إني أقول مهما أقول هلاقي حد يحس بيا ويسمعني ولو صوت واحد اتعلمت إني أنسى همومي بمجرد ما عيوني تدمع وانا بقرأ بوست لغيري حسيت بيه ببقى عايزة أروح لحد عنده أعمله أي حاجه عشان يكون فرحان وموش زعلان ومهموم وإني حزني مهما كان كبير بيتحول لما أشوف غيري تعبان في مدونته وموش عارفه أعمله إيه بنسى نفسي وأفتكر إن في شخص حزين ومهموم إني في حد عنده ظرف طارق والله اعلم بيه يـــأه اتعلمت كتير بجد وحسيت بيهم كتير كنت بفرح لفرحة اللي بيحب جديد أو خاطب أو اتجوز وأبكي على حال المجروح أو التعبان وأقول ياريتني كنت أقدر أعمله حاجه أو كنت أعرفه مباشرة يمكن يكون ربنا جاعلنى سبب له لتخفيف همه اتعلمت إني أٌبل النصيحه وأحسها بجد وإني أنصح غيري باللي يمليه عليا ضميري اتعلمت إن الدنيا فعلا لسه فيها خير ولو بسيط بس ما زال موجود ناس طيبين وبيحسوا بيا وممكن يكونوا مصدقيني وممكن يكونوا حاسين بيا اتعلمت إن في أصوات حرة كتير بترفض الظلم والإنكسار وبتقول رأيها بدون خوف ,,

صدقني يا علاء لو عديت اللي اتعلمته صعب أحصره وصعب أنقل إحساسه لأنه عالم بجد شاف ضحكتي ودموعي مع بعض دون انفصال .

السؤال الخامس:-

ـــــــــــــــــــــــــــ

إيه أكتر حاجة كرهتيها ؟

كرهت السلبية اللي شوفتها في بعض الردود والموضوعات في مدونات كرهت الإنحطاط الأخلاقي والديني اللي لاقيته في بعض المدونات كرهت الأذى اللي بيجي من بعض مدونات ردت على مدونتي وإما أذوني بكلمات قذرة ومواقع قذرة أو فيروسات يبعتوها ويقولوا إنه حاجه كويسة كرهت الشر اللي في بعض البشر اللي في عالم المدونات ده اللي كرهته لحد دلوقت بث ههههه الله أعلم هشوف إيه تاني من البشر .

السؤال السادس:-

ـــــــــــــــــــــــــــ

حاسة إن التدوين له تأثير ؟

ماهو موش شرط التدوين المهم محتوى التدوين المصداقية والعقلانية اللي فيه ده بالنسبة لتأثير المدونات الاخرى عليا لكن عموما بما فيهم مدونتي فده بصراحه ريحني كتير خلاني أحس نوعا ما بوجود الخير في الدنيا خلاني أصدق إن في ناس فعلا بتخاف ربنا وإن فيهم اللي موش بيخاف يقول رأيه أثر فيا بجد عالم المدونات واتعلمت منه كتير وشفت ناس كتير مهمومة وناس فرحانه وناس ذوي خبرة بجد اتعلمت منه كتييييير

أهدي التاج لمين يا ميرو لمين :-

1- أحمد صاحب مدونة لاست فرعون

2- مصطفى صاحب مدونة حكايات زمان

3- شباب أونلاين

أول تــــــــــــــــــاج

السلام عليكم ورحمة الله وبركاته

بسم الله الرحمن الرحيم

مرحلة التاج

كتير شوفتها في بعض المدونات اللي بدخلها وكنت بستمتع بيها أوي لأنها بتخليني أقرأ البشر أكثر وأتعرف عليهم من خلال حديثهم عن نفسهم كنت بخاف يجيلي تاج موش لأني موش عايزة حد يعرفني لأ لأني تعبت أقول مين مريم وهما مصدقين مريم ولا لاء اللي جوه النت وداخل مدونتها وبترد في عالم المدونات والمنتديات هي هي اللي بره النت ولا دي واحده بترسم شخصية غير شخصيتها موش عارفه حد هيفهم احساسي اللي حساه ولا لاء اللي معاشرني في الحقيقة بيأكدوا إني بالفعل شخصية واحده موش إزدواجية واللي عارفيني نت كتير بيظلموني احترت بجد ومع ذلك هجاوب على ال 3 تاجات الموجهين ليا وربنا يعلم إن مريم فيهم نفسها مريم اللي بره الشاشة دي

أول تاج موجه من مدونة دخلتها صاحبتها لذيذة أوي قرأت فيها شوية وانقطعت وبلغتني إن يوجد لي تاج عندها وكان في أغسطس وبعتزرلها للتأخير غصب عني بجد موش كنت عارفه أتكلم وأحكي عن حالي للأسباب التي وضحتها بالأعلى

هذا التاج موجه من fire bird طائر النار

والآن سأجيب على أول تاج :-

ـــــــــــــــــــــــــــــــــــــــــــــــــــــ

1- أذكر 5 أحلام على الأقل تخص ماضيك وتحلم فيها بتغيير أشياء ماذا ستعدل وماذا ستترك ؟

أ- الحلم الأول :-

ـــــــــــــــــــــــــــــ

كان نفسي يبقى لي أخت شقيقة أحكيلها وتحكيلي أترمي في حضنها وقت ما الدنيا تيجي عليا أزورها وهي متجوزه في بيتها ألعب مع ولادها أسمع منهم كلمة خالتو الأم الثانية ليهم لكن ربنا موش أراد يبقى لي أخوات بنات وفضلت وحيدة أهلي بنت واحده

ب- الحلم الثاني:-

ـــــــــــــــــــــــــــ

حلمت يكون لي أخ أكبر مني يبقى سند ليا في الدنيا حما من الأيام وغدرها صاحب أحكيله وقت ما أقع في أزمة أب تاني ليا حنان جارف يحسسني إني بنته موش أخته وبس يبقى ليا كل حاجه وأبق له كل حاجه أخرج معاه الناس تحسدنا على بعض تحتار ده أخوها ولا جوزها ولا صديق ولا إيه بالظبط من قوة علاقتنا اللي بتربطنا ببعض كان نفسي ولكن ليس كل ما يتمناه المرء يدركه ربنا يباركلي في محمد أخويا هو أصغر مني وحاولت يكون معايا زي ما بتمنى موش عرفت

ج- الحلم الثالث:-

ـــــــــــــــــــــــــــــــ

حلمت أعيش في عيلة يكون كلها حب في حب إخلاص وفاء ناس تحس ببعضها بجد تقدر كلمة الترابط الأسري الإتحاد وقت الأزمات الكلمة الواحده من غير ما تتقال بالأمر لكن بالحب كله يقولها مع بعض في صوت واحد الجيب الواحد محدش يقول دي بنت اخويا لكن يقول بنت اخويا هي بنتي بنت أختي هي بنتي ولاد العم هما أخوات موش ولاد عم وبس الحب للحب خارج المصلحة العيلة يعني اللمة الضحكة الكلام والسؤال عن حال بعض موش كلام عن سيرة الناس ونقد الغير وإحنا فينا عيوب حلمت وفي أحلامي بس برسم ده وإلا لو ضاع حتى حلمي موش هعرف أعيش في الدنيا دي.

د- الحلم الرابع:-

ـــــــــــــــــــــــــــــ

حلمت أدرس كل حاجه بحبها وعايزة أعرف فيها وأنمي معلوماتي ولو بقدر بسيط بس أعرف وأفهم واللي أعرفه أفيد بيه غيري وياسلام لو غيري ده موش قادر يتعلم أبدأ معاه أنا وأساعده موش عارفه أوصفلك إزاي بس بالظبط إحساسي كأني عايزة أقعد في بيئة الغير قادرين على كل حاجه وأحاول أساعدهم على أد ما أقدر أسمعهم أحاول أوصل صوتهم أحل مشاكلهم وبرده ده حلم والناس بتفتكرني مجنونه أو مثالية زيادة عن اللزوم أو بلعب دور ملاك باتقان يــــــاه على اللي بسمعه .

هـ - الحلم الخامس:-

ـــــــــــــــــــــــــ

حلمت أعرف الناس مين هي مريم بل موش حلم ده تمني تعبت كتير في الحلم ده قبل ما أنام بدعي ربنا الناس تحبني وتعرفني عشان حاسين إن هي دي مريم شخصيتها دي الحقيقية بكون حزينة أوي لما ألاقي حد يقولي إنتي ساذجة دي موش طيبة أو إن طبعك كده وهو موش يعرفني بقعد أقول كتير طيب عاشروني الأول حاولوا تعرفوني عن قرب وأكيد موش ملاك وراضيه أبني معاكم أهدم الغلط اللي فيا و أصلحه وأبقى للأفضل بس موش يتهموني من غير ما يعرفوني فشلت أخلي الناس تفهم مريم عن قرب كله يشوفها من بعيد بنظرة قريبة من وجهة نظرهم بينت كل حاجه

2- أذكر 5 أحلام على الأقل تخص مستقبلك ؟

أ- الحلم الأول:-

ـــــــــــــــــــــــــــ

بحلم أحقق رسالتي الأولى اللي قال عليها ربنا وأتقنها وأحققها بنجاح تحت رعاية ربنا إني أكون زوجة صالحة لزوج يكون لي كل حاجه أب وأخ وصديق وأم وأخت وأهل وابن وأكون عنده كل حاجه يحس بيا وأحس بيه من غير ما نحكي و أنجب أطفال 4 توائم يملوا حياتنا وأبني العيلة اللي بحلم بيها وأتمنى تكون زي ما بحلم عيلة شايفة مامتها وباباها كل حاجه ليهم أصدقاء وأهل وأخوات وكل حاجه ليهم وبردوا يحسوا بينا ونحس بيهم من غير كلام .

ب- الحلم الثاني:-

ـــــــــــــــــــــــــــ

بحلم أكون دكتورة بالجامعة وأكمل في مجال يفيد الناس وأشتغل في كادر مهم بالحياة يفيد غيري قبل ما يفيدني المهم إنه يحقق الخير لغيري قبل ما يحققه مني عشان أحس إن ليا فايده في الدنيا و قدرت أسعد غيري وأغير حياته بعد مساعدة ربنا.

ج-الحلم الثالث:-

ـــــــــــــــــــــــــــ

بحلم أعرف في الكمبيوتر من أول مسمار اخترع فيه لآخر حاجه في عالم الكمبيوتر و أعمل مدرسة صغيرة أعلم فيها كل الأطفال الغير قادرين على التعليم أعلمهم فيها كل حاجه في الكمبيوتر و يتعلموا لغة كمان عشان يقدروا يلاقوا شغل زي ما إحنا شايفين الشغل بقى بشروط يعني الناس دي تموت ولا إيه ؟

د- الحلم الرابع:-

ـــــــــــــــــــــــــــ

بحلم أحفظ القرآن كله وأكون من حاملي كتاب الله أتكلم كلام ربنا وبسنة رسولنا الحبيب وأعلم ولادي كده ويكون كلامهم مبني على صحة كلام ربنا وسنة الرسول وبس وموش يعملوا بكلام حد تاني غير كلام ربنا وبس وبكده هيراعوا ربنا في كل حاجه .

هـ - الحلم الخامس:-

ـــــــــــــــــــــــــــــــ

بحلم أكمل أركان إسلامي بالحج بس قبلها أطلع ماما تحج قبل مني ربنا يكتبها لها يارب وتتكتبلي أحج أنا كمان وأعمل حجة كمان لإنسانة حبيتها أوي من كلام انسان عليها وتوفاها الله واعتبرتها زي ماما بالظبط وبتمنى كل حاجه موش عملتها بالدنيا ومسموح لحد يعملها نيابة عنها ربنا يقدرني وأعملها عشانها وبقولها ربنا يرحمك يارب ويغفر لك ويدخلك جناته اللهم آمين يارب العالمين .

3- أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟

هو أنا بحياتي ناس موش كتير وموش قليلين لكن بحبهم أوي بجد وبيخافوا عليا وبيحبوني أوي ومن معاشرتي ليهم ومعاشرتهم ليا عرفوني بجد وربنا يخليهم ليا يارب ويديم الحب بينا بس أكتر اتنين اتمنيت يكونوا في حياتي جواها أوي ويربطني بيهم صلة يمكن حد منهم دخل نوعا ما وبقى قريب ليا ويعرفني كويس هي رشا ونانيس بحس فيهم كتير إنهم عارفيني واتمنيت تكون بحياتي من يوم ما اتولدت وجيت للدنيا وبصراحه اتمنيتهم يكونوا ليا أخواتي من أم واحده وأب واحد والشخص التاني هو حبيبة ودي طفلة بموت فيها جدااااااا اتمنيت أقابلها وتعيش معايا وأعيش معاها وتبقى حياتي بيها مرتبطة بشكل دائم خارج مرحلة التمني بس زي ما قلت موش كل اللي بتمناه بيتحقق حظي كده

4- أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟

كنت بتمنى أعاهد عصر الرسول أو يكون موجود لحد الآن وأتعلم منه كتير حاسة إن في كتير حاجات كانت هتتغير وتبقى أحلى بالدنيا

والشخص التاني موجود وبحس كتير إنه موش معايا و موش موجود بس كل اللي بتمناه إنه يفضل في حياتي للأبد لحد ما أموت ويكون لي منه أطفال في طيبته وخفة دمه وتكون بينا أقوى رابطه في الدنيا تكون قايمة على الحب والحنية والطيبة والمودة والرحمة وياريته يكون فعلا موجود زي ما بتمنى ويكون هو كمان بيتمنى

بهدي التاج لمين ؟؟

ممكن أقول إن التاج ده بتمنى مين يرد عليه :-

ahmed_k صاحب مدونة دردشة عربي

nour el deen صاحب مدونة نور الدين

أحمد صاحب مدونة last_fr3oon

sasa صاحب مدونة حكايات زمان

عايش ولكن صاحب مدونة عجبي

بتمني كل الناس تجاوب على التاج بس يلا نبدأ بدول ويارب موث يكثفوني خالث بقى ويجاوبوا علىا لتاج زي ما أنا جاوبت

ورمضان كريم ليكم جميعا

في رعاية الله

بدعـــــــــــــي لأبويـــــــــــــا

السلام عليكم ورحمة الله و بركاته

بسم الله الرحمن الرحيم

دي أغنية هاني شاكر ولكن للأسف قصيرة جدا وانا حسيتها كتير وحسيت بكلماتها وآهاته اللي طالعه منه

وحبيت أكملها أنا

الأغنية عبارة عن كوبليه واحد ينتهي عند بالصبر على كل اللي فات ...

بدعــــــــي لأبويـــــا

بدعي لأبويا اللي مات

ولأخواتي البنــــات

ولأم شايلة همهم

بالصبر على كل اللي فات

بدعي وأقول يارب قدرني

و على الأيام قادر تصبرني

هعيش لأمي ولأخواتي

ويارب يا قادر تكرمني

يارب هستعين بيك في خطواتي

وهدعيك أكتر في صلاتي

ما قلت أدعوني أستجب

يارب تحفظلي أمي و أخواتي

حمل كبير وشايله يا ربي

وهتبدأ خلاص مع الدنيا حربي

ومعاك مؤمن بنصرك

وموش خايف الدنيا تغدر بي